由一月二十二日開始, 到今天為止, 我都仲未曾可以搵到一份新工, 但係, 係搵工既過程裡面, 我真係對 d 公司好失望!

失望既會係 d 咩呢?  當然係爭既人多之外, 薪金方面都係一個問題啦!  而家既情況係, 要求超高, 但係又人工勁低, 呢 d 都算, 冇得講呀, 因為係大勢所趨, 供過於求呀嘛!

但係個問題係, d 人好搞野下囉!  我唔係做開會計既, 但係, 我對一 d 請會計既工, 都會有申請, 又前後有兩間公司 call 過我去見工!  我一心諗住, 真係好喇, 因為我冇經驗, 佢地都肯見我, 咁人工低 d 既, 都冇所謂啦, 放長線吊大魚呀嘛. 

點不知, 第一間都好 d 呀, 因為佢都有誠意, 亦都認真咁樣同我去傾!  我開始同佢對話既時候, 我都覺得有 d 唔妥!  我只係覺得佢見我有兩張日文既三, 四級既証書, 同埋有 LCC & I 既証書, 佢就叫我去見, 而冇睇我有冇經驗囉.  都唔緊要, 因為佢都好有誠意咁同我傾, 亦都叫我去試佢公司既營業部既職位添,  當然, 結果都係唔得啦!

之後, 又有一間打黎, 佢好似好醒目咁樣, 佢打黎就問我係咪 SEND 去搵會計助理, 我心諗, 你咁問得, 應該都知我冇經驗掛, 因為我有 CV 比佢呀嘛.  然後佢仲話佢係西環, 問我遠唔遠!  係呢個時勢, 我仲可以要求地點咩.... 我梗係想去見左先啦, 因為我真係想轉行做會計呀嘛. 

之後, 去見果間, 呢個肥師奶真係好過份, 佢坐落黎同我傾左真係得兩句, 第一句就係問你, 之前份工做咩?  我話主要係跟單, 佢即刻好似好出奇, 之後,又問我, 你冇做過會計呀?  我話係呀!  佢就即刻話唔係好0岩, 佢地要求既係要識 FULL SET 既會計助理囉....

我頂!  佢個廣告又冇寫要有會計既相關經驗, 佢又唔睇我既 CV, 只係睇你既証書, 有就叫你黎見, 呢下先激氣呀嘛!  

去到咁遠, 講唔夠兩分鐘就話, 唔好意思, 要你白行.... 唉.... 點解佢唔係約人之前, 睇清楚人地既 CV 先呢?  咁我 SEND 比佢又有咩意思呢?  

我係到呼籲, 如果真係有心請人既公司同高層, 希望你地可以先認真去睇睇人地既 CV, 有冇相關既經驗, 如果唔肯定既, 就係約人既時候, 問下個申請人先, 唔好浪費人地既車費同時間呀!

老實講, 對於我地呢 D 想轉行但又冇經驗又未搵到工既, 仲要成日只撞到呢 D 咁既白撞公司, 除左浪費我地既車費之外, 仲有我地既時間同希望呀!  請各顧主多多體諒, 先認真睇睇申請人既 CV 先啦, 唔該! 就算真係冇有關既經驗, 都希望比個機會, 傾多幾句, 了解多 D, 可能會係你要搵既人黎呢......  希望同機會, 係大家比大家0架嘛, 係咪?!